Wiehnachtsgedanke 2024 – Friede uf Ärde

«Uf einisch sy umen Ängel ume grossi Schare vo Himelsheer gsi, die hei Gott globet u gseit: Ehr für Gott i der Höchi, und uf der Ärde Friede …»

Geit’s no! Wie chöme die Ängle druf, «uf der Ärde Friede» vom Himmu obe abe z’rüefe? Itz wo überau krieget wird? U dört, wo me enang no grad nid d’Chöpf yschlat, isch me churz drvor. No nie heig’s uf dr Wäut so viu bewaffneti Konflikte gä wie hüt, ghört me überall. Die Ängle hei ja ke Ahnig! Friede, usgrächnet!

Mini Gedanke schweife ab. Eigetlech bi ni näbem Bärner Rathuus ir Staatskanzlei im Zimmer C301 u mi Grossratskolleg het grad si geistlech Input am Afang vo üsere Fraktionssitzig churz vor dr Wintersession 2024. Wüu’s uf Wiehnachte zuegeit, liest är e Abschnitt vor us em nöie Teschtamänt uf Bärndütsch, us dr Wiehnachtsgschicht nach em Lukasevangelium.

So richtig zuelose cha ni nid. Z’viu Gedanke schwire mir düre Chopf. Friede? Friede uf Ärde? U das usgrächnet hüt – eh, usgrächnet denn u usgrächnet zu dene. Si äch d’Hirte o so vore Chopf gstosse gsy wie ig, wo d’Ängle ne hei Friede vom Himmu obe abe gwünscht? Wie isch äch das bi ihne acho. Uf em Fäud, wyt ab vor Gsellschaft, chönnt me sech scho no vorstelle, dass si hei dr Friede gha… Usgstosse vor Gsellschaft, a Rand drängt, chuum gnue zum Läbe, 24-Stundeschichte schiebe, wuche-, monate-, jahrelang… Friede? Was hei sie sich under «Friede» vorgstellt u was mir? Isch dr Friede denn necher gsy aus hüt?

Dr Keiser Ougustus het zur Volkszählig grüeft, dass o ja aui Stüüre zahle! Was macht me mit Stüüre? Strasse u Hüser boue, Spese vor Regierig zahle, Spitäler rette, ds Militär finanziere, … u scho isch dr Friede i wyti Ferni grückt…

Dr Herodes het Angscht übercho, es chönnt ihm öpper sini Herrschaft strittig mache. Abgä hät är die äuä chuum freiwillig, de scho ender mit aune Mittel verteidiget. Friede?

Dass Maria u Josef so schynbar friedlech ihres Chindli hei dörfe in Empfang näh, isch nün Monet vorhär o uf dr Kippi gstande. Dr Josef isch druf u dran gsy, sini Verlobti wäge Frömdga wieder z’verlah.

Friede isch es kostbars Guet. U glych chöi mer ne mit nüt uf dr Wäut choufe. U äuä grad drum bruuche mer immer wieder öpper, wo üs «Friede» zuerüeft, we’s um üs u i üs chrieget.

Friedlechi Wiehnachte!