Sit dir acho? Aha, dir weit wüsse, wo? Ja, bi Wiehnachte! Dir lueget so gspässig?! Itz hei mir doch über drei Wuche Zyt gha für azcho. Sit denn isch Adväntszyt – auso d’Zyt für sech Zyt z’näh für azcho. Sogar d’KI meint drzue: «Advent bedeutet „Ankunft“ (vom Lateinischen adventus) und ist die christliche Vorbereitungs- und Wartezeit auf die Geburt Jesu Christi an Weihnachten, aber auch auf dessen Wiederkehr; es ist eine Zeit der Vorfreude, Besinnung und Traditionen wie Adventskranz, Adventskalender und Plätzchenbacken, die auf die Ankunft Gottes in der Welt einstimmen.»

U nid nume d’KI, nei, o d’Parlamentarier:inne im Bundeshuus wüsse das. Si hei ir letschte Session e Vorstoss drzue ygreicht. Si wei d’Wintersession um zwe Wuche vorverschiebe. Si wei wieder meh Zyt ha für azcho u nümm diräkt vom Bundeshuus mit em Tanneboum underem Arm müesse i d’Familiewiehnachtsfyr platze. Sech ir Adväntszyt Zyt näh für azcho u das Jahr für Jahr… Oder hättet dir’s lieber wie dä Journalist het vorgschlage. Är het gmeint, mi sötts mit Wiehnachte so mache wie d’FIFA mit dr Fuessballwäutmeischterschaft. Au Schautjahr einisch läng.

Dr Platzhirsch isch acho

Szenewächsu: I höntere übere Waisehuusplatz gäge d’Nägeligass. Es isch fröschtelig a däm Novämbermorge u i ha’s drum pressant. Churzum muess i doch ahaute u stuune: Dr Platzhirsch – für nid Yheimeschi ds Raclett- u Glüehwiistübli uf em Bärner Wiehnachtsmärit vis-à-vis vom Bundeshuus – liegt i Einzuteili am Bode u ar Huusmuur entlang staple sech riesegi Kartonschachtle mit übergrosse, rote Wiehnachtschugle. Si isch definitiv acho, d’Wiehnachtszyt ir Stadt – u das no vor em Zibelemärit.

Mini Gedanke schweife ab. Acho. U bi mir? Isch si acho, d’Wiehnachtszyt? U was bedütet das? Bi ig acho? Wott i überhoupt acho? U wenn ja, was bruucht’s de, dass i achume? U wo söui acho? Ir Wiehnachtszyt oder vilech o eifach im Läbe? Bi mir? Was vo mir söu acho? Nei, das wird itz nid e tiefepsychologischi Abhandlig. Di chöi aui besser säuber für sich mache.

O Umwäge ghöre drzue

Acho. Acho si ou Maria u Josef nach ere länge Reis vo Nazaret uf Bethlehem. Während dere hei si sech äuä zmingscht i Gedanke immer wieder chönne Zyt näh für azcho. Azcho bim Gedanke e Familie z’wärde. Azcho bim Gedanke, öpperem Familie z’si, wo ja eigetlech gar nid zur Familie ghörti. Si si aber de o würklech acho? Ja, aber vilech nid so, wie si das erwartet hei. Ires Hotel het nume ei Stärn gha u dä isch ersch no ganz wyt obe am Himu ghanget – kes Qualitätsmerkmal für irdischi Behusige, sondern es Zeiche vo Gott, dass äbe o Jesus isch acho u mir is desswäge o hüt no ir Adväntszyt Zyt näme für azcho.

Das Zeiche hei o d’Weise us em Morgeland gseh u sech ufe Wäg gmacht – drmit het so quasi iri Adväntszyt agfange. Acho si si auerdings zersch am fautsche Ort, nämlech bim Herodes am Chünigshof. U dört isch e grossi Hecktig usbroche. Ufbruch, nüt vo acho! E nöie Chünig? U mir wüsse nüt drvo? Hei ke Zyt gha für is Zyt z’näh für azcho bi däm Gedanke. E Chünig ghört doch a ne Chünigshof. We dä achunnt, müesste mir ds Fäud ruume? U das isch doch ds puure Gägeteil vo acho.

Ds Fäud gruumt hei anderi, aber us Fröid. D’Hirte si nach dr Akündigung vo de Ängle schnuerstraks uf Bethlehem gschuenet. Ke Zyt no ne Adväntszyt zwüsche z’schaute, ke Zyt für sech Zyt z’näh für azcho. Eifach ga, so schnäu wie müglech. U de ändlech acho bi däm Jesus, wo äxtra für üs isch acho i üsere Wäut.

Sech Zyt näh

Är het sini Wäut verlah für i üsi Wäut z’cho. U vilech müesse o mir öppe mau üsi eigeti Wäut verlah u nis ufe Wäg mache, wie d’Weise us em Morgelang Umwäge nid verachte u wie Maria u Josef o dert acho, wo mer’s eigetlech nid erwarte. Ruume mer ds Fäud vou Fröid wie d’Hirte u näh mer is i dere Zyt immer wieder Zyt für azcho.

Xägneti Wiehnachtszyt.