Itz längt’s. I höre uf, la aus la liege, schmeisse dr Bättu häre. Fertig, Schluss. I ma nümm. I ha gnue. I houe’s. Uf u wäg. Het nid sogar d’Maria us dr Wiehnachtsgschicht Reissaus gno, churz nachdäm si vom Ängu erfahre het, dass si schwanger isch? Nei, i bi nid schwanger u en Ängu isch mi o nid cho bsueche. Gnue ha ni trotzdäm. Itz houe nis. Ab, wäg, furt. Was d’Maria darf, darf ig o. Ändlech mau nüt. Nüt u niemer, wo öppis vo mer wott, wo ds Gfüeu het u mer ds Gfüeu git, i sött itz. Mau richtig blau mache. Zrügg lähne, gniesse, nid a morn dänke u ersch rächt nid a übermorn. Dr Job a Nagu hänke, ke Verantwortig me trage, nume no für mi luege. Söue mau die andere. I ha scho gnue gmacht. Itz längt’s. Punkt!
A propos Job a Nagu hänke. Dervo git’s no anderi Bispiu ir Wiehnachtsgschicht. Nid nume d’Maria het aus la stah, o d’Hirte hei ihre Arbeitsplatz verlah, si eifach drvo u ab nach Bethlehem. U denn zumal hei no nid ganzi Wolfsrudel per staatlechi Verfüegig chönne abgschosse wärde. Herdeschutz isch no Handarbeit gsy im 24-Stundedienscht. Aber ihri bruefleche Verpflichtige hei d’Hirtelüt nid abghaute.
O d’Könige us em Morgeland hei ihri Stärnwarte verlah u si uf die nächschti Karawane gäge Jerusalem. Ok, mit Abhoue het das itz vilech weniger z’tüe. Mi müsst ender säge, si si uf Betriebsusflug oder Forschigsexpetition gange. E Tapetewächsu isch es aber scho gsy.
So eine hätt äuä o dr Herodes nötig gha. Emu sicher ab denn, wo är het müesse drvo usga, dass ihm öpper si Thron strittig macht. Aus la gheie u abhoue wär aber glych z’setze gsy mit der Ufgab vo sire Regäntschaft. Läbe im Exil? – De scho lieber nid.
Nid nume dr Herodes het müess usharre, o sini Bedienschtete. Es isch ne nüt anders übrig bliebe. U so geit’s no hüt viune Lüt. I dänke da nid nume a d’Bundesrät:inne u d’UNO-Generalsekretäre. Nei, i dänke vor auem a d’Flüchtlinge i de Rückkehrzäntre u a die i de Flüchtlingslager, wo weder hinderschi no fürschi chöi. I dänke aber o a au die, wo Opfer vo Mönschehandel si worde u itz im ne usbütterische Zwangsarbeitsverhältnis gfange si. Oder a die, wo im ne Alters- oder Behindereteheim wohl guet versorgt wärde, aber äbe versorget si worde. I dänke o a die, wo wäge Wasser u Schlamm oder Dürri ihres Dehei, ja ihri Läbesgrundlag hei verlore u itz vor em Nüt stöh. A au die, wo ke Uswäg me gseh.
U ig? Wott i immer no uf u drvo, eifach ds Läbe gniesse? Wäg vo au däm Eländ. Nümme häre luege u nümme zuelose. Nüt a mi häre la. Söue würklech nume die andere? Isch es nid o mini Verantwortig?
U we Jesus eifach abghoue wär?
Xägneti Wiehnachte